La Fundación Municipal de Cultura llanza "Retratando Asturies", el I Certame de Pintura, Dibuxu y Retratu, dientro del III festival "Diva Avilés". La convocatoria ta  dirixida a artistes con diversidá funcional, asina como a centros y asociaciones xuníes a la so atención y promoción, col envís de puxar y facer bultable'l talentu creativu y los valores artísticos del coleutivu.

Col títulu de 'La guapura, la esencia y la diversidá d'Asturies', podrán concursar toles persones mayores de 16 años. Cada artista podrá presentar sólo una obra, con total llibertá de téunica y estilu, sobre un soporte que tenga como mínimu'l tamañu A4.

Les obres podrán entregase hasta'l vienres 5 de setiembre na Factoría Cultural, de llunes a vienres n'horariu de 9:00 a 13:30 hores. Nelles, los y les autores  podrán poner la so visión personal d'Asturies, al traviés de los sos  paisaxes, la so xente o cualquier cosa que-y pete pa garrar la esencia d'esta tierra. 

El certame tien tres categoríes: retratu, dibuxu y ilustración y pintura. En caúna d'elles danse cuatro premios, consistentes en cheques regalu por importes de 150, 100, 50 y 30 euros, que se pueden cambiar nel comerciu llocal.

Amás, coles obres esbillaes fadráse una esposición coleutiva na sala d'esposiciones de la Factoría Cultural y pasarán a la fase final del certame en caúna de les modalidaes.

Les bases del certame pueden consultase nesti enllaz: https://aviles.es/documents/20124/7449386/Diva+Retratando+Asturias.pdf/