La Casa de Cultura d'Avilés va acoyer esti vienres 2 de mayu (19:30 hores) un actu d'homenaxe al periodista Damián Barreiro, un referente de la cultura asturiana y que finó'l pasáu 5 de febreru de forma inesperada a los 40 años. L'actu, entamáu pol Conceyu d'Avilés y la Xunta pola Defensa de la Llingua Asturiana (XDLA), organización na que militaba, foi presentáu esta mañana por Xosé Candel, voceru de XDLA y pola conceyala de Normalización Llinguística, Ana Solís.

Col títulu 'Universu Damián', confirmaron la so presencia artistes y personalidaes que representen perbién el mundu del qu'escribía'l periodista, como'l agitador folclóricu Rodrigo Cuevas; la cantaora Mariluz Cristóbal Caunedo; el DJ d'electrónica de raigañu Fruela 757; el grupu de música tradicional fundida Algaire; el gaiteru Llorián García Flórez; y l'acordionista y cantante Beatriz. Tamién va tar l'actriz Natalia Suárez Ríos. La entrada ye llibre hasta completar aforu.

La del vienres va ser una cita cola cultura pop y de raigañu, trasgresión, identidá, diversión y país, pa facer alcordanza d'una persona que tenía toes estes elementos nel so ADN y pal que se va a entamar esti homenaxe pensáu dende l'amistá.

Llicenciáu en Periodismu pola Universidá del País Vascu, Damián Barreiro foi ún de los periodistes referenciales de los medios de comunicación n’asturianu, amás d’un reconocíu ensayista, tando especializáu en cuestiones rellacionaes cola cultura asturiana. Como periodista exerció n’Asturies.com, en Les Noticies y dende va años n’Europa Press. Yera miembru del conseyu de redacción del Anuariu de la Música Asturiana y tien collaborao con Musicasturiana.com, ente otros medios de comunicación.

Foi’l creador de la canal de YouTube Horros y Frixuelos nel qu’analizaba la cultura asturiana dende la so particular perspectiva pop, aportando un gran valir a los estudios sobre la identidá’l país. Nesti sen, conceptos anguaño usaos como’l de pop llariegu, son autoría d’él.

Como ensayista tien ganao tres vegaes el Premiu Máximo Fuertes Acevedo d’Ensayu que convoca’l Principáu d’Asturies gracies a les obres 'Asturploitation'; 'Caleya Sésamu: el papel de la televisión na tresmisión interxeneracional de la llingua'; y 'Asturianía kitsch: decálogu de la cultura pop astur'.

Tamién algamó’l premiu d’ensayu Fierro Botas que convocaba’l Conceyu de Xixón con 'L’espeyu onde miranos. Televisiones de proximidá n’Europa Occidental y procesos de recuperación identitaria'. Amás, publicó’l llibru 'Yo la to llingua', un repasu a la historia del asturianu escrito pa un públicu xuvenil.

Al marxe del so gran llabor como periodista y analista de la cultura asturiana dende una perspectiva mui necesaria, Damián tamién tenía una gran personalidá y una calidá humana que fai que munchísima xente lu quixera. El próximu vienres 2 na Casa la Cultura d’Avilés va amosase tou esi ciñu y homenaxear tolo que Damián foi, ye y siguirá siendo.