CaleyAvilés propón cuatro visites a sitios emblemáticos de la ciudá

CaleyAvilés propón cuatro visites a sitios emblemáticos de la ciudá

Publicado el 21 de Junio de 2021
La primera, el vienres 25 de xunu, y una más cada mes del veranu, en xunetu, agostu y setiembre; toes, a les 19.00 hores

Una actividá de baldre, entamada pola Estaya de la Llingua, pola que se va poder conocer bien el parque Ferrera, el cascu históricu, el cementeriu La Carriona y el barriu marineru de Sabugo. Con 15 places como muncho pa cada propuesta, hai d'apuntase pel corréu electrónicu estayallingua@aviles.es, pel teléfonu 985 545 508 o nel númberu de Whatsapp 634 821 613

Imagen de CaleyAvilés 2021 Imagen de CaleyAvilés 2021

Conocer bien espacios emblemáticos  de la ciudá gracies a una visita fecha con procuru guiada n'asturianu. Asina ye Caleyavilés, una propuesta de baldre entamada pola conceyalía de Cultura d'Avilés dende la Estaya de la Llingua, que vuelve otru veranu más a la programación cultural de la ciudá, y cola que se va poder entrar nos secretos del parque Ferrera, el cascu históricu, el cementeriu La Carriona y el barriu marineru de Sabugo.

El parque Ferrera sedrá la primer visita, el vienres 25 de xunu, a les 19.00 hores (el mesmu horariu pa toles demás). Lo mesmo nel casu del conocíu pulmón verde de la ciudá, como nos demás percorríos, les persones que participen podrán contar coles esplicaciones espertes del o de la guía que les acompañe en cada casu.

Por culpa'l COVID-19 y la pandemia, el númberu de places pa cada visita va ser 15. P'apuntase pue facese pel corréu electrónicu na direición estayallingua@aviles.es, pel teléfonu nel númberu 985 545 508 o pela aplicación de Whatsapp nel númberu 634 821 613.

Durarán más o menos una hora y media y recomiéndase llevar zapatu cómodu. Neños y neñes tendrán de dir siempre con una persona adulta.

 

Programa de visites

Parque Ferrera. 25 de xunu. 19.00 hores

Con un puntu d'alcuentru nel edificiu de La Noria, que ta dientro'l mesmu parque Ferrera, la bióloga Ángeles Rodríguez Tuñón va esplicar la cultura y les creyencies alrodiu los árboles más emblemáticos de la historia d'Asturies, como carbayos, castañales o texos, ente otros.

Cascu históricu d'Avilés. 23 de xunetu. 19.00 hores

La plaza España, delantre'l palaciu consistorial, sedrá'l puntu d'alcuentru pa una visita conducida por Denis Soria Fernández, guía oficial del Principáu d'Asturies. Va enseñar diferentes procesos históricos d'una ciudá milenaria, al traviés de los monumentos que llaren les cais más representatives del so cascu históricu.

Cementeriu La Carriona. 13 d'agostu. 19.00 hores

El puntu d'alcuentru va ser el CicLaC, Centru d'Interpretación del Cementeriu La Carriona. Denis Soria Fernández, guía oficial del Principáu d'Asturies, va empobinanos per un espaciu de finales del sieglu XIX, diseñáu pol arquiteutu Ricardo Marcos Bausá. Un sitiu mui importante dende'l puntu de vista históricu-artísticu, fechu pol que ta dientro l'ASCE, Association of Significant Cementeries in Europe.

Barriu de Sabugo. 3 de setiembre. 19.00 hores

La última visita programada tendrá como puntu d'alcuentru la plaza d'El Carbayo, delantre la ilesia vieya de Sabugo. Va ser otra vez, Denis Soria Fernández, guía oficial del Principáu d'Asturies, el que va acompangar la historia y comentar los ñicios d'identidá del barriu más especial y nomáu del Avilés vieyu medieval.

Imprimir

Eventos destacados