La Estaya de la Llingua celebra con un vidiu'l Día de les Lletres Asturianes

La Estaya de la Llingua celebra con un vidiu'l Día de les Lletres Asturianes

Publicado el 6 de Mayo de 2021
Mañana vienres, 7 de mayu

Podrá vese dende les 00:00 hores del vienres y ta grabáu nel Teatru Palacio Valdés onde diferentes persones lleen testos d'autores d'Avilés. Amás, repartiráse'l puzzle Ayalgues Asturianes nos centros públicos y concertaos de la ciudá onde se da llingua asturiana

Grabación nel Teatru Palacio Valdés Grabación nel Teatru Palacio Valdés

El vienres, 7 de mayu, Día de les Lletres Asturianes, la Estaya de la Llingua tien programaes actividaes pa emponderar una cita tan especial, una celebración na qu'asturianos y asturianes faen un homenaxe a la lliteratura escrita en llingua asturiana, tamién a los y les sos autores, y que se vien celebrando dende 1980.

Dientro de les feches nel calendariu que la Estaya de la Llingua tien marcaos como díes especiales, (Día Internacional de la Muyer, Día Internacional de la Madre Tierra, Día Mundial del Mediu Ambiente) nun podía faltar esti alcuentru tan especial cola llingua asturiana.

Asina que se va emitir peles redes sociales un vidiu grabáu nel Teatru Palacio Valdés nel que diferentes persones d'Avilés van lleer testos propios y tamién testos d'otros y otres autores d'époques pasaes que s'escribíen n'asturianu. Ente otres lleeránse obres de Marcos del Torniello, Bernardo Guardado o Matilde de Soignie.

Podrá vese dende les 00:00 hores del mesmu día 7 de mayu nes redes sociales del Conceyu d'Avilés, na revista dixital de la Fundación Municipal de Cultura, la web de la Estaya de la Llingua y la plataforma dixital PlayPresta. Tamién va contase cola colaboración de mayores y pequeños, cantantes, escritores, actores y d'otros sectores profesionales. Buscóse que seya un homenaxe mui participativu y prestosu, too contao nel marcu incomparable del Palacio Valdés.

Otra de les actividaes programaes pola Estaya ye la entrega de caxes del puzzle Ayalgues Asturianes a tolos centros educativos d'Avilés de Primaria, públicos y concertaos, onde se dea l'asignatura de llingua asturiana. Esta iniciativa faise gracies a les donaciones de la empresa Acuto Xuegos, que diseñó varios xuegos n'asturianu de la mano de Félix Fernández.

Imprimir

Próximos eventos