El circuitu lliterariu 'Autores nel camín', pol que puxa la Conseyería de Cultura y Política Llingüística, per aciu de la Direición Xeneral de Política Llingüística, y que ta protagonizáu por escritores ganadores de los premios en llingua asturiana, torna p'Avilés pa tner un alcuentru col alumnáu del Colexu Públicu La Carriona-Miranda. Sedrá esti llunes a les 10.30 hores y el protagonista sedrá l'autor avilesín Xose Ánxelu Gutiérrez Morán, ganador del 'Premiu María Xosefa Canellada de Lliteratura Infantil y Xuvenil 2023'

Dende la Conceyalía de Normalización Llingüística del Conceyu d'Avilés, preténdese averar a dellos y delles autores qu'escriben n'asturianu al coleutivu mozu, pa despertar l'interés pola lliteratura de casa y puxar pol usu de la llingua. 

Poro, a neños y neñes de la escuela La Carriona-Miranda diéronse-yos varios exemplares de la obra 'Contando colos deos' que ganó'l premiu María Josefa Canellada y podrán pregunta-y al autor tolo que-yos pete sobre'l cuentu o sobre la so carrera d'escritor. Tres del alcuentru, los llibros van quedar na biblioteca del centru.

Xosé Anxelu Gutiérrez Morán (Avilés, 1969) ye biólogu y trabaya como investigador nel Centru Oceanográficu de Gijón/Xixón. Amás ye profesor de ciencies marines y respeutu a la so parte lliteraria tien publicaos varios  poemarios, siempre n'asturianu.

Ganó varios premios como'l Teodoro Cuesta o del 'Concursu de Cuentos pola Oficialidá del Asturianu.  Premiu Xuan María Acebal de poesía por 'Un ciertu desorde' y en 2023 ganó'l Premiu María Josefa Canellada de Lliteratura Infantil y Xuvenil, el más prestixosu  de la lliteratura pa neños y neñes escrita n'asturianu.