Contacto

La conceyala de normalización llingüística, Ana Solís, presentó güei'l  proyeutu Ñeru, pa la recuperación de toponimia tradicional, en rueda de prensa. Esta iniciativa amesta'l trabayu de les editoriales avilesines Acuto Xuegos y Nenyuri y l'ilustrador Cuinchi, pal espardimientu y la normalización de la toponimia del Conceyu d'Avilés, con aiciones empobinaes al públicu en xeneral y tamién al públicu preadolescente y adolescente.

La conceyala Ana Solís tuvo acompañada por Félix Fernández, de la editorial Acuto Xuegos y Susana Sela, de la editorial Nenyuri, los dos promotores del proyeutu y creadores de los materiales que busquen normalizar l'usu de la toponimia tradicional oficializada n'iniciatives públiques y privaes.

Ente'l material más destacáu fízose, pal públicu adulto, un mapa del conceyu con una tirada de mil exemplares, de los que 40 van enmarcase y tamién se fizo una versión dixital. Pal públicu preadolescente y adolescente, plantegóse la publicación de material didáuticu pal profesoráu de 6^u de primaria y de los dos primeros años de secundaria. En concreto, una carpeta de tamañu 45 x 32 centímetros que tien na portada y na contraportada'l mapa de la toponimia del conceyu y per dientro, hai un crucigrama, curiosidaes y una biografía curtia de cuatro escritores d'Avilés con munchu renome: Matilde de Soignie, Marcos del Torniello, Bernardino Guardado y Damián Barreiro

Pal desendolcu d'esti proyeutu contóse col asesoramientu d'espertos en diferentes ámbitosd, como Fernando Balbuena o Cesáreo García Fernández. Pal material didáuticu, consultóse al profesoráu d'asturianu sobre'l contenidu y formatu del material. Nos dos casos, la revisión última fízola la Estaya de la Llingua del Conceyu d'Avilés.

La distribución de los materiales fadráse a sitios oficiales del conceyu, a les asociaciones de vecinos y vecinas, comerciu avilesín y centros educativos.